Kan Palab, tag-ada han payag nga akon sinirongan dida han magmadlos us’ kagab-i

July 26th, 2005

Dila ko na la 

an mamara nga parte

han nangungurog-kurog ko nga lawas.

Tumuktok ako ha imo payag

ngan didto imo ak’ pinauswag,

pinahigop hin sabaw nga mapaso-paso,

pinasuno mo ako han taklap

han nabarikasan mo nga  dughan,

pero ini,

ini,

tubtob la hit’ paghuraw.

An siday hinin akon dila, Palab,

an magbalos pagpanday

han im’ dughan nga nagay-ab.

SIDAY | Comment (0)

Hi Kabatok nag-alog ha Basay

July 15th, 2005

Waray sulod an akon biso.

Nabugsay ako tikang ha Digyo 

basi mag-alog hin lambonaw.

Iginkarapo ko ikaw pagtikadto

ko ha burabod, nagpapas-an ka han

dako nga daba nga puno hin tubig.

Buot ko ibutang

an akon hinahabak nga biso.

Paghirani mo, lumingiw ka.

Umuli ako, puno hin lambonaw

an akon biso. An akon dughan

waray kaalgi bis’ usa ka turo.

                                                                                    

                                                                                                               


1 Nangangahulogan nga “kaaway, o kontra.” An kadaan nga  ngaran han Tacloban in “Kankabatok” —buot sidngon ha literal nga paghubad— “lugar nga tinatag-iyahan han kaaway.” 

SIDAY | Comment (1)