An Akon Pinakamasulob-on nga Pamahaw

Han ikaduha ko nga pagtimo

han bahaw nga kan-on

nga binahogan hin noodles

nga mataghom,

may langaw nga humogdon–

usa ka dangaw

tikang ha akon pinggan–

ngada han mumo

nga nakada ha lamesa,

nataktak dida han

syahan ko nga pagtimo.

Dayon ko nga tinabog,

dinagpas

han akon wala nga kamot

ngan puroton

an uusa nga mumo

ha lamesa

balik

ha akon pinggan.

SIDAY | Comment (0)

An Kada Ta Ginhawa

An kada ta ginhawa

in’ pagbiling han kanunay.*

^^^

Ginbiling ta

dida han hinimo ko nga siday,

dida han inukit mo nga ladawan.

^^^

An kada ta ginhawa

in’ pagtultol han kanunay.

^^^

Ginbiling ta

ha akon kasingkasing,

ha imo tagoangkan.

^^^

An kada ta ginhawa

in’ paghanaw han kanunay.

^^^

Ginbiling ta

ha akon panumdoman,

ha imo mga im-im.

^^^

Ginbiling ko.

Ginbiling mo.

^^^

Ginbibiling ta la gihapon–

tubtob waray na kita

man-ginhawa:

^^^

ha kanunay 

SIDAY | Comments (8)