An Makasurobo han Kamatayon
Kan Man’ Supron, usa han mga naunong
dida han hinihimo pa la an tulay han San Juanico
^
Sugad hin usa nga bato nga ihinalo
ha minamasa nga semento, ha usa
ka tipak hin dalikyat–nahulog ka
^
ngadto han nagliliro nga lawod,
diin waray sirak, waray bulan,
waray bitoon an kahiladman.
^
Bisan tipak han aningal
han imo kurahab waray hibatii,
waray hikit-i, waray hikagii.
^
Makasurobo para hin usa
nga buhi inin kamatayon.
Pero, ambot kan Mano Supron.
SIDAY | Comment (0)Saad
Han akon paglaspay nga’t ha Dubai
nagsaad kita nga duha
nga diri ta palalakton an gugma
dinhi hinin portahan
hinin aton mga dughan.
Magsasaad kita…
tubtob nga ini nga mga pulong
diri na tinuod.
SIDAY | Comment (0)An Akon Pinakamasulob-on nga Pamahaw (revised)
Han ikaduha ko nga pagtimo
han bahaw nga kan-on
(nga binahogan hin noodles
nga kanan kagab-i),
may langaw nga humogdon
usa ka dangaw
tikang ha akon pinggan
diin nakada in usa nga mumo
nataktak dida han
syahan ko nga pagtimo.
Dagos ko dagpason han luwag
an dumagil nga langaw.
(Pasalamat hiya
waray hiya maigo.)
Akon pinurot–
an akon iginhalot–
balik ha akon pinggan.
Pagtimo ko utro–
an bahaw, an sabaw,
mas tumognaw.
SIDAY | Comment (1)