Lawa-lawa

Nagsusulsi ako

han akon balay

han dagpason mo ini

han siphid.

^^

Nagtatahi ako

han akon balay

han dukdokon mo ini

han silhig.

^^

Naghahabwan ako

han akon balay

han imo ini sinalibay

hin tsinelas.

^^

Maghihibwan ako

hit’ akon balay;

Magsusulsi ako

hit’ akon balay;

^^

Magtatahi ako

hit’ akon balay;

ha kada takna

nga ini rinuruba.

SIDAY | Comment (0)

Paghimaya

Ha ngaran han pagka-urosa, pagdukwag ug pagkauripon…

Paghimayaon ka Juan ug Juana

kay kami nga mga Waray

mamamagtinag-alog na.

Gindadayaw kamo nga labi

han mga Waray nga tanan

ngan gindadayaw man

an amon mga anak

nga magkakakukutang.

Papagtinag-alogon

mo kami niyan

ha amon hirohimangraw

ha ikina-adlaw.

Pagwad-on mo

an amon panumdoman

sugad han pagwara niyo

han amon pinulongan.

Siya nawa.

SIDAY | Comments (2)