An Maupay ha mga Waray
Kun hinuhobsan inin akon dughan
sugad hiton medyahan,
dayon ko ini inaalgan
didto kanda Mana Semang
(Mana Semang, ilista la anay).
^^^
Di ak’ nagpipinanuyangko
kay inin kasingkasing
kun hubas–tinataro-tangwayan
ngan pagtinagay-tagayan;
kun puno–binabaro-basyahan
ngan pagtinagay-tagayan
tubtob nga mamagsol-ay,
manlunay ngan mangayat hin away
^^^
ngan ha prisinto huronan
upod han hubas nga medyahan.
SIDAY | Comments (6)Yana nga Tabis Akon Isusurat
(Paghubad han
kan Pablo Neruda “Puedo escriber los versos…”
ni Voltaire Q. Oyzon)
^^^
Yana nga tabis akon isusurat duro kamasulob-on nga mga berso.
Isusurat pananglitan: ‘Nagkaprag an kagab-ihon, ha hirayo
nag-aasul ngan kinakadal nga mga bitoon.’
An hangin hinin kagab-ihon ha kalarakan nagkakanta
ngan naglilibon .
Yana nga tabis akon isusurat duro kamasulob-on nga mga berso.
Hinihigugma ko hiya, danay hinihigugma ako niya.
Ha mga kagab-i nga sugad hini, kinugukos ko hiya ha akon
mga butkon.
Hinahadkan ngan hinahadkan ha ilarom han waray pag-ultan
nga kahanaypan.
Hinihigugma ako niya ngan danay hinihigugma ko hiya.
Aanhon han usa nga diri maruyag han talagsaon, mahilom
niya nga mga mata.
Yana nga tabis akon isusurat duro kamasulob-on nga mga berso.
Ha paghunahuna nga waray na hiya ha akon, ha pag-abat nga
nawara hiya ha akon.
Ha pagbati hini’n hilarom na nga kagab-ihon, nga duroy
hinmilarom kay waray na hiya ha akon.
Ngan an siday nanunuro ngadi hini’n kalag sugad han
tun-og ngada han banwa.
Kay ano ngani nga an akon gugma waray makagtipig ha iya.
An gab-i nagkuprag ngan hirayo hiya ha akon.
Asya ini an nga tanan. Didto ha unhan may nagkakanta.
Didto ha unhan.
Inin kalag di namumurayaw nga tikang ha iya naanaw hiya.
Pinamimiling hiya hini’n panan-aw nga daw karuyag
masingdto ha iya.
Iniiliw hiya hini’n kasingkasing, ngan hirayo hiya ha akon.
Asya gihapon ini nga gab-i an naglalawag hini’n kakahoyan.
Kami, yana nga takna, diri na sugad han hadto.
Di ko na hiya higugmaon, sigurado ako, pero hinihigugma ko
pa nga gayod hiya .
Inin akon tingog nananalingkamot pamiling han huyuhoy
nga makakatubil han iya dalonggan.
Iba. Ha iba na hiya. Sugad han nakadi pa hiya ha akon mga harok.
An iya tingog, an iya lawas. An iya waray tubtoban nga mga mata.
Diri ko na hiya higugmaon, sigurado ako, pero bangin higugmaon ko pa hiya.
Inin gugma haligotay, an paglimot maihaay.
Kay ha mga kab-i nga sugad hini aadi hiya ha akon mga butkon
Inin kalag di namumurayaw nga tikang ha iya naanaw hiya.
Kun amo ini an urhi nga maihahatag niya ha akon pag-antos,
ini man liwat an akon kataposan nga siday nga isusurat para ha iya.
SIDAY | Comments (3)