Pagduyan
ni Sarojini Naidu
Hinubad ni Voltaire Q. Oyzon
–
Tikang ha maghamot nga mga tanom,
ngada ha bawbaw han kahumayan,
ngadto ha magkaluyo nga pangpang
hinin sapa,dara ko para ha imo
naranggat han tun-og
gamay, makaruruyag nga inop.
–
Piyonga an imo mga mata, pinalangga,
nagsisinaragyaw an ihalas nga mga
bukatkat ha engkantohanon nga dalakit;
Tikang han kahoy han amapola
kinawat ko para ha imo
gamay, makaruruyag nga inop.
–
Pinalangga ko nga mga mata, katurog na,
naglalawag ha imo an bulawanon
nga kahayag han kabiton-an;
Hahapohapon
ta ikaw hinin
gamay, makaruruyag nga inop.
Sarapati
Kan Mano Otoy ngan Suzette
–
Hadto nga gab-i
nakada huhuron
an busag nga sarapati
ha malaybalay
bubong hinin amon balay.
–
Lawod na an oras
han ikaw Mano magmaupay:
nakatulo, ha balay
nga imo anay hadto inuokyan.
–
Humiling ako ha bintana pagkita
kun hin-o adi nga magmamaupay.
–
Pagkaatubang ta ha may portahan,
waray pa ngani pakiana
nga nagawas tikang ha akon baba,
dayon ka nga sumiring: “Nag-away kami.”
Pero ha imo kamot
nga nagbibitbit hin dako nga bagahe
sul-ot mo pa an singsing
han iyo pagsumpaay didto
ha kadaan nga simbahan han Barugo.
–
Inandam ko an imo higdaan–
an imo hadto higdaan.
–
Bumalik ako ha akon kwarto pagkaturog.
Pagtama han akon irong
ha mahumok nga ulonan—
akon nabatian an palapaka han pako
han naukoy nga sarapati
ha malaybalay
bubong hinin amon balay:
–
tipahirayo.
Uncategorized | Comments (3)An siday
Paghubad han kan Pablo Neruda “La Poesia” ni Voltaire Q. Oyzon
_ _ _
Ngan hadto nga pangidaron…
umabot an siday
nagbibiling ha akon. Ambot,
di ak’ maaram
diin hiya magtikang—dida han
kat-yelo o dida’n salog.
Di ak’ maaram tionan-o, o kakan-o,
diri mga tingog, diri mga pulong,
diri mga hinilom,
kundi tikang ha kalsada ako gintawag,
tikang han mga sanga han kagab-ihon,
tigda tikang ha iba,
dida han mapintas nga kalayo
o dida han pag-uli nga nag-uusaan,
waray ko maiaatubang,
hinapohap ako niya.
—
Di ak’ maaram han ak’
igluluwas, an ak’ baba
di nasabot
panngaran,
di nakita an ak’ mga mata,
may nagtikang ha akon kalag,
dagaang, o mga pako nga
linimot,
nagmalahimo ako
hin pagsantop
hadto nga kalayo,
ngan akon isinurat an una,
nagpupukatpukat nga linya,
kamaluya, waray hangkag, waray
nga gayod hinungdan,
kinaadman nga gayod
hin usa nga tapang,
ngan tigda akon hinkit-an—
tumokas,
umabri
an langit,
mga planeta,
umhanan nga daw dughan
nga naglilinagobo,
luholuho nga lambong,
tinusoktusok hin mga pana,
kalayo ngan kabukaran,
naglalangbid nga kagab-ihon,
an kalarakan.
—
Ngan, ako ,usa nga binuhat, waray
sukol han kagutiay,
hultok hinin haloag nga
kabituonan hinin
kawarayan,
mga alid-agid, ladawan han
misteryo,
inabat an kalugaringon nga
kaparti ngay-an
han kahiladman nga waray salad,
nakiglibon ako han mga bitoon,
ngat’ han hangin bumukalas an
ak’ kasingkasing.
Uncategorized | Comment (1)Ayaw, hinay-hinay gad la hin kalaya
Hapyora
inin nangangapay ko nga dughan
sugad han paghapyod
han nagtatagiyos nga truk
ha mga bukad hinin kalachuchi
ha ligid hinin kalsada.
-
Hapyora,
ngan ihulog ha tuna.
An dumaraga ni Man’ Osing
dida han paghahangsara pa la–
kaanad hin duro.
–
Yana, tikang ko la
pag-inirok-irokan
baga na hin layaw…
pagtutukdagi, pag-iiroki,
manlabyaw.
Uncategorized | Comment (0)An mananggiti nga taga-Kataisan
diri nananggot kun aga
diri nananggot kun kulop
aada panananggot kun
hawan na an kalsada
_ _ _
nagdadaplas,
nagsasaklang
bisan waray tangga
- - -
maaram ha masirom
kun hain an daol
bibilnga…
- - -
human pakataga,
di malusad
dida huhuron ha langit–
makulambid
ha nanhuhoyot nga bunga han lubi
- - -
ngan dida maghuhulat
han syahan nga tugaok:
takna han iya utro nga pagbaya.
Uncategorized | Comment (0)An Tag-iya
Tinag-iya niya an tuna.
Tinag-iya niya an tubig.
Tinag-iya niya an langit.
Tinag-iya an nga tanan.
^^^
Ngan ini nga tag-iya
pagtatag-iyahon
han tuna
han tubig
han langit
ug nga tanan.
SIDAY | Comment (1)