Text

Ha akon cellphone

mayda ko 150 characters

para han akon mensahe,

mayda 600+ entries

nga pwede ko padad-an hin text,

mayda ko load

nga magdudul-ong hiton akon text

ngadto ha kada tagsa ha ira

diin man hinin kalibotan…

.

manggud,

di ak’ maaram

kun ano it’ ak’ iyayakan.

SIDAY | Comments (2)

An kataposan nga tagay

ni Nicanor Parra

Hinubad ni Voltaire Q. Oyzon

.

Maruyag kita madiri,

tutulo la an aton pagpipilian:

an kakulop, an yana ug buwas.

.

Diri ngani matulo

kay siring pa han kamag-araman

an kakulop kakulop

ha aton la panumdoman ini naaangkon:

waray rahondahon nga makukuha

ha bukad nga pininggot.

.

Duha na la an aton baraha

nga nasasalin:

an yana ug an buwas.

.

Ngan diri ngani maduha

kay maaram man kita

nga waray sinisiring nga yana

labot la nga amo ini an karaygan han naglabay

ug naanaw na…

sugad han pagkabata.

.

Ha katapos-taposan—

buwas na la an nabibilin ha aton.

Akon ihinahalad ini nga tagay

para hito nga adlaw nga diri maabot.

.

Manggud,an buwas—an amo la nga takna

nga nasasalin para aton.

Uncategorized | Comment (1)

Pagdayaw ngadto han dagat

Paghubad ni Voltaire Q. Oyzon han kan Pablo Neruda "Ode to the Sea"

–

Dinhi, palibot hini nga isla,

amo an dagat,

pero ano ba ini nga dagat

pirmi la

naglalapwas,

matangdo, kahuman mabaribad,

katima mabaribad ug mabaribad na liwat,

matangdo hin maasul,

urit nga itatabsik an iya mga balud,

matipa ug utro nga matipa.

Di nakakaukoy:

magyayamyam "Ako an Dagat,"

tinatampalo an kabatoan

ngan kun diri ini hira natuo

hinahapyod, pinapahuruman

ngan linulumos hin harok

han maberde, pipito nga mga dila

maberde, pipito nga kaayaman

maberde, pipito nga katigrihan

maberde, pipito nga kadagatan,

dinadabo an kalugaringon dughan,

iginyayamyam an iya ngaran.

–

Pastilan, dagat, asya gad an imo ngaran,

O lawod, amon kaupod:

Ayaw gad pagkinarag hin oras o tubig

tungod la hin kangalas:

Lugod, panabangi kami,

kabos

nga parapangisda,

mga binuhat han baybayon,

ginugutom, kinakadal

ngan kaaway ka pa namon,

ayaw gad pagduroha paglamba,

an im’ guliat ay’ gad pagdakoa:

lugod, tuksi an maberde mo nga kaban

ibutang

gasa nga plata

ha amon mga palad;

tagan mo kami niyan hin isda namon ha ikinaadlaw.

–

Ini gad la

an amon hinihingyap.

Bisan gad ini himo hin plata,

hin hayag han bulan ngan maburuong,

para gad ini

ha kablas nga kusina.

Ayaw gad ito pagguomi.

Madagmit mo nga pinapasarang

an imo kahalot

sugad han mahulos nga lilinti

ha ilarom han im’ mga balud.

Pakig-usa na gad ha amon,

bukalsi na gad ito,

ibutang diin

amon ito maabot.

Tabangi kami, lawod,

amay nga maberde ngan di matutungkad,

buligi kami pag-ugtas

han kanan kalibutan kakablasan.

Paggani

kita han abunda

nga bunga han im’ kinabuhi,

an im’ trigo ngan mga ubas,

kabakahan ngan mga mina,

an im’ tubignon nga katingalahan

pinahuroman nga mga bunga.

–

Sayod kami han im’ ngaran,

Amay nga dagat: iginkukuruo ini

han mga kanaway ha bawbaw hinin kabadsan.

Taknong na gad:

Ay’ na gad pagbaribad,

Ay’ na gad kami pagtagi hin kabaraka,

Ayaw pagbuonga an maanyag mo nga mga ngipon

matungod la han im’ tinguha pagpukan han langit.

Ipinid la anay

an makatitingala nga mga susumat,

tagan mo kami niyan hin isda namon ha ikinaadlaw,

dako o gamay bahala ka

usa ha kada lalaki,

babaye

ug puya.

–

–

(ipapadayon paghubad han sumpay kun ako makahigayon…)

SIDAY | Comments (2)