An Paragsikad-sikad nga akon sinakyan

Han aton paglarga

dayon nga dinugsang

an akon irong

han imo alimyon,

maaslomay

daw lakob/arinola

nga ginmad-an.

^

Pero, inagaw

han akon pangulaw

an mga agi han adlaw

nga nakada ha imo panit

(nga sugad-sugad hin kokwa

an kolor).

Ha imo agtang

nga nagpapapamahuray

hin balhas

nakada an mga bagis-bagis,

siguro talaan han mga dalan

han kinabuhi

nga imo gintrinaysikolan.

Ha imo butkon

nagataw an kaugatan

nga daw mga uga nga baging han dalakit

ha kada pangungusog

han imo mga tiil

ha pidalan.

^

Pumidal ka hin duha kagatos

napulo kag unom

tikang ha tulay han Himanglos

pakadto ha paradahan.

^

Tag-tres pesos an pasahe

tikang bisan-diin

tubtob bisan-diin

sakob hinin bungto.

Tinagan ta ikaw hin singko.

^

Han imo paglarga

balon ko ha ak’ hunahuna

an imo alimyon.

Pero, diri la gihapon ako sigurado

kun an tanan nga imo kusog

nabaydan ko.

SIDAY | Comments (4)