Libnas

 

Ha butnga hinin daganas

han Iningles ngan Tinag-alog–

kapti, Iday, an mga ngaran nga:

 

Hamurawon,

Ulalapay,

Karayakay,

Dapdap

 

Burogtongon

Lagpakon

Dalakit,

Butangalon

 

Ha butnga hinin babaha

han Iningles ngan Tinag-alog–

gunit, Iday,  ha Kamalunggay!

Uncategorized | Comments (2)

Pangisda

Kan Itay Selo, suhito ha kalalawdan han Pasipiko

 

 

 

Nagraranggat

han kadamo han dakop nga bitoon

an Makabugsay,+ an pukot nga kahiloagan

nga nakatunod ha kahiladman

han kahanaypan.

 

Oras na basi libahon an tinunod ta nga pukot.

 

Matungtong ako ha duha nga baybayan

hinin sakayan, maguko nga bubutongon

an aton igintunod nga  langit:

 

Unom na kapanyo aton natibaw: Hain

daw an mga bitoon hinin lambonaw?

 

Waray ka aringasa.

 

Ha butnga han at’ kawaray saba,

mingaw nga naghihiru-himangraw

an sandangaw nga mga  balud

ngan han ligwat han imo bugsay

nga danay sabatan hin naagi nga kanaway.

 

Natungtong ako ha duha nga baybayan

hinin aton sakayan,

naduko nga nagbubutong

hinin mahawan,mamimgaw ta nga langit:

 

waray man la nag-iinggat 

 bisan butiti nga libat.

 

“Ayaw ta  pagtinamori,” sumiring ka,

“inin waray ranggat,

mabug-at,

mamingaw nga langit

nga aton liniliba.”

 

“Panhangad kita, didto

diin nagbuburo-bukatkat hin kadamo han tuloy nga bitoon—

an pukot han kalarakan

nga nakatunod ha kahiladman

hinin kahanaypan.

 

 

Uncategorized | Comment (0)