An Parabola han Usa nga Ayam

 

 

Dida hini nga aton paglakaton

mingaw kita’n duha. Pumakiana ako basi kita

may pag-istoryahan: Mayda ba Diyos?

 

An dagos ko nga pakiana ko ha imo

samtang ginkikinulawan ta ha aton paglabay

anbukog-na-la nga ayam

nga nakada ha butnga’n kalsada–

naglilinibot-libot may ginbibiling—

siguro, pagkaon

kay nagsusumat ha akon

an iya nan-gagataw nga mga tol-an.

 

Hunahuna ko na man la:

(Kay ano aanhi pamimiling hin pagkaon ini nga ayam?

Di ba hiya maaram nga iton pagkaon

aadto ito ha mga pangaraonan, karenderiya o

basurahan?)

 

Dinhi hini nga punto

sumiplat ha ak an ayam.

 

Ngan tikang dida,

sugad ha imo,

ginguoman ko na la

an ak’ dila.

 

SIDAY | Comment (1)

Pagtamay ni Voltaire Oyzon han mga Libro ha People’s Center Library nga Diri Niya Nahuhuram

 

Kamo

an urhi nga hahapwaton

kun masusunog

ini nga iyo inuokyan.

 

Uunahon

an iyo mga istante, lamesa,

lingkoran ug mga cabinet  

hini nga iyo inuokyan.

 

Libro?

Kamo an urhi

nga kakawaton

dinhi hini nga Republika.

SIDAY | Comments (2)